Астанада 2–3 сәуір күндері Қалибек Қуанышбаев атындағы Қазақ ұлттық музыкалық драма театры сахнасында «Шідер» атты детектив-драма жанрындағы алғашқы қойылымның премьерасы өтті.
Спектакль авторы — Бақытжан Қаратегі, сахналық нұсқасын жасаған — Мұрат Әбіл, режиссёрі — Әлібек Өмірбекұлы. Бас рөлдерді Айнұр Болат пен Ержан Нұрымбет сомдайды.
Сахнада екі актер мен шектеулі декорация қолданылған. Уақыт пен кеңістік ауысымдары жарық арқылы беріледі. Қойылымда Желтоқсан оқиғасы, ядролық полигон мәселесі, Кеңес одағының ыдырауы сияқты тарихи кезеңдерге емеуріндер жасалған.
Қосан мен Ақжан — бір дәуірдің балалары. Оларды тоғыстырған Алматының ыстық көшелері, ал айырған — тағдырдың құпия жолы. Бірі — ел үшін үнсіз қызмет еткен барлаушы, екіншісі — сол елдің шеттегі қорғаушысы. Екі егемен елдің барлаушы азаматтары, шет елде Қазақстан қауіпсіздігін қаматамассыз еткен. Махаббат бар, бірақ айтуға болмайды. Сағыныш бар, бірақ жол жабық. Оларды ұстап тұрған — шідер. Бұл — ел тағдыры мен жеке сезім арасындағы күрес туралы драма», — дейді авторлар.
Режиссёрдің айтуынша, бүгінгі қоғам, әсіресе жас буын Қазақстанның заманауи тарихынан алыстап барады. Ал «Барлау» қызметі жайлы түсінік көпшілік үшін көмескі. Осы қойылым арқылы ол сол беймәлім әлемнің бір үзігін сахна тілімен жеткізуді мақсат тұтқан.
«Шідер» детектив-драмасының Алматыдағы премьерасы 15–16 сәуір күндері сағат 19:00-де өтеді.
